西班牙玩細不恭

　　「鬥牛士」再施無鋒迷魂陣催眠「高盧雞」！今晚世界盃歐洲區外圍賽I組重頭戲，西班牙主場迎戰同是兩戰全勝的法國。西班牙教頭迪保斯基自歐國盃後迷上無鋒戰陣，特別係面對強隊一定用呢招，只求贏波，唔介意踢得沉悶，而法國正處於重組摸索期，箭頭賓施馬一返國

　　雖然西班牙幾名前鋒費蘭度托利斯、韋拿、蘇爾達杜狀態唔曳，但主帥迪保斯基自今夏歐國盃後，對無鋒戰陣情有獨鍾，尤其是與強隊交鋒時，迪帥對中場控球權同人數優勢極其重視，起用法比加斯做「假前鋒」，唔單止因為佢有唔錯入球能力，最重要係呢位巴塞中場經常墮後串連進攻，配合擅於控制節奏的沙維、恩尼斯達、大衞施華、沙比阿朗素等高手，就算攻你唔入，都唔會搶輸個波。

　　另一邊廂，法國新帥迪甘斯認為今仗只能盡人事，坦言對戰勝西班牙機會唔大，一來該隊經歷歐國盃動盪，現時處於重整階段，主力拿斯尼、馬維拿仍接受內部停賽。而在皇馬重拾信心的箭頭賓施馬，一返「高盧雞」就腳軟，佢近16次為法國上陣僅得3球士哥，而「賓仔」又係欺善怕惡之流，於正式比賽對強隊總係交唔到貨，旨意佢就蛇都死啦！

　　今仗「鬥牛士」好大機會好似歐國盃時咁，入波後就搓到完場，主勝穩陣但1.33倍實在乏味，既然一隊擅搓波，另一隊冇火力，唔慌多波入，細盤有1.8倍值得捧場。